من أنا؟

بقلم خيري رمضان ١٠/٧/٢٠٠٧
لدي رسالة في بريدي منذ شهور قليلة، لم أنشرها، لأني لا أعرف ماذا أقول لصاحبها. كل مرة أجهز كلماتي للرد عليه ومناقشته، فأكتشف أني أقول خطبة عصماء وكلاماً بلا معني، يشبه كلام السادة المسؤولين الذي يملأون به الصحف، ويصرخون به في وجوهنا علي شاشات التليفزيون بثقة وبرود يحسدون عليهما.

ولكن كلمة الرئيس مبارك إلي الشباب، التي نقلت وأذيعت أمس علي لسان صفوت الشريف، هي التي شجعتني علي نشر الرسالة الآن، خاصة بعدما طالب الرئيس الشباب بالتمسك بقيمة المواطنة وإعلائها.. ورفض المتاجرة بمصالح الوطن.

تقول الرسالة:

(الأستاذ...

أنا شاب مصري من إحدي قري الصعيد. تخرجت في الجامعة منذ ٧ سنوات، حصلت علي بكالوريوس تجارة، ولا تدري ماذا فعل والدي حتي يعلمني أنا وأشقائي الستة، طبيعتي أنني شاب متفائل، أكره الصحف التي تنتقد كل شيء، أحب التليفزيون المصري ، حيث إنه كان الوحيد المتاح، كما أحب الصحف القومية، لذلك نشأت وترعرعت علي حب السادة المسؤولين، أحب الرئيس والسيدة حرمه، وأيضا نجليهما علاء وجمال، وكل الوزراء ومديري المصالح، وكنت دائما أقول إنه طالما الرئيس اختار هؤلاء «يبقوا كويسين، ماهو مش ممكن يختار فاسدين أو لصوص يحكمونا، أصله ابن بلد زينا وبيحب مصر».

المهم وبعد تخرجي حاولت أشتغل أي حاجة، حتي لو عامل. سافرت المحافظة، عملت قهوجي، وشفت الذل، فعملت بائع في محل وفشلت، فكرت أن أعمل ماسح أحذية ولكن نفسي عزت عليه.

نسيت أقول لك إني كنت باحب بنت عمي من صغري، وكنا متفقين علي الزواج، وبعدما فاض بأهلها، تزوجها شاب يعمل في الخليج.

لا أريد أن أقلبها مأساة، ولكن الحقيقة إني حزين جداً، حاسس إني فاشل، والوحدة صديقة الشيطان الذي يزورني دائما ويقول لي، بتحب مصر ليه، عملت لك إيه، علمتك، وبعدين؟ عالجتك؟ دا العيلة كلها عيانة، وعايشين علي الإسبرين، والله لو دخلت الوحدة الصحية عندنا تموت من شكلها.. بتحبها ليه؟ دا الميه سودة في الحنفية إن وجدت، وبنركب عربيات داتسون، زينا زي البهايم ـ لامؤاخذة ـ وأبويا ضهره اتقطم، بيعمل مزارع، والحمد لله إننا لسه قادرين ناكل.

لم أرسل إليك علشان تشوف لي شغل، ما أنا عارف إنها أزمة كبيرة في مصر كلها، لكن أنا مش فاهم هي مصر البلد اللي إحنا عايشين فيها، ولا هي اللي في إعلانات الجرايد، فيلات ومدن جديدة ومارينا وعربيات شكلها حلو قوي، مصر اللي في الجرايد والتليفزيون بتاعة مين؟ هي دي مصر اللي بنحبها، لكن منعرفهاش ومعشنهاش، مصر بتاعتنا مريضة وفقيرة، واللي عنده حمار وعشة يبقي ياهناه وسعده.

عاوز أسألك سؤال: إزاي أحب مصر وليه أحبها؟ وهل ينفع أحبها لوحدي، يعني حب من طرف واحد.. أرجوك جاوبني!).

من لديه رد علي صاحب هذه الرسالة ليته يساعدني لأنني عاجز عن الرد.